SIKOP ang usa ka retirado nga polis kinsa giingong tigpayuhot og ginadiling druga human gipahigayon ang search warrant operation sulod sa iyang balay sa Brgy. Poblacion, Lugait, Misamis Oriental.
Ang operasyon gihimo sa Philippine Drug Enforcement Agency (PDEA) sa Amihanang bahin sa Mindanao ubos sa pagpangulo ni Regional Driector Wilkins Villanueva niadtong Martes, Agusto 14, 2018 nga miresulta sa pagkasikop ni retired Senior Police Officer 4 Ruben Vilbar.
Gisilbi sa PDEA-Northern Mindanao ang search warrant kauban ang nagkadaiyang unit sa kapolisan ug nakuha sa posisyon sa suspek ang giingong 50 gramo sa gituohang shabu nga gibana-banang mobalor og P340, 000.
Lakip sa nakuha ang pistola nga kalibre .45, laing .38 kalibre ug nagkadaiyang armas nga dunay buhing bala, sakyanan ug uban pang illegal drug paraphernalia.
Matud ni Villanueva nga ang suspek dako og koneksyon kang Ardot Parojinog sa wala pa nasikop human namatikdan ang pagbisita niini didto sa Ozamis City.
Kalapasan sa Republic Act 9165 kon Dangerous Drugs Act ang gitakdang atubangon sa dinakpan.