GIPAMUGOS sa kampo sa New People’s Army (NPA) nga ang napatay sa engkwentro tali sa mga sundalo sa Impasug-ong, Bukidnon dili nila membro.
Kini ang pamahayag ni Ka Malin Mabini, ang tigpamaba North Central Mindanao Command sa NPA, kinsa niingon nga usa ka Niño Yandog ang namatay samtang duha ang samdan nga giilang sila si Reyje ug Malinay nga pulos mga sibilyan.
Nagpahigayon og operasyon ang Bukidnon Provincial Mobile Forces uban ang 403rd Infantry Brigade (IB) human giingong anaay presensya sa NPA sa Barangay Bontongon diin nahitabo ang engkwentro.
Miabot ngadto sa lima ka minuto ang pagbinayloay og bala apan sa uwahi mi-withdraw ang walhong grupo human adunay namatay sa ilang sakop.
Si 2nd Lt. Tere Ingente, ang tigpamaba sa 4th Infantry Division, Philippine Army, niingon nga dili na ikatingala nga i-deny sa ilang lider nga ilang membro ang napatay.
Sa bahin ni 403rd IB commander Brigadier General Eric Vinoya, iyang gibutyag nga nasubo siya og maayo nga laing kinabuhi na usab ang nakalas gumikan lamang sa mga walhong gurpo nga walay paglantaw sa kahapsay ug kalinaw sa nasod.
“This could not have happened if he heeded our continued call for them to go down, surrender, and embrace peace,” matud ni Vinoya.