DILI sayon ang gihimo sa Cagayan de Oro City Health aron lamang nga mapasabot sa katawhan kung unsa ka importante ang pagbaton og pansayan sa matag panimalay.
Nasayran nga gipanghingusgan sa tinugyanan sa CHO ang pag-edukar sa matag panimalay sa importansiya sa aduna’y pansayan gumikan kay dako kaayo ang posibilidad nga malikay sa mga sakit.
Gibutyag ni Dra. Rachel Daba Dilla nga nagpahigayon sila og mga seminar sa matag Barangay ilabi na sa mga Kapitan, Kagawad ug mga Barangay Health Workers (BHW) diin sila ang magdasig sa mga residente pagbaton og pansayan.
“Grabe diay ang mga diseases that will be prevented kung naa kay kasilyas, sila na mismo maghimo sa ilang kasilyas,” pahayag ni Dilla.
Giingong nagpahigayon usab kini sila og Community-Led Total Sanitation (CLTS) diin mismong ang mga hugaw sa tawo ang ilang gipangita kauban ang komunidad ug matag hugaw butangan kini og papel.
“So nakita nila nga kadaghan ba sa puti-puti, sila na mismo na-aware nga daghan man diay ta gapanglibang, abi nakog ako ra,” dugang niini.
Gidugang pa nga mismong ang katawhan na ang nakaingon nga kinahanglan gyud sila nga magbaton og pansayan ug dili na magpagawas sa hugaw bisan asa human nakita ang gi-presentar sa mga sanitary inspectors.
“Next among gihimo katong tae among gikuha among gibutang og styrofoam, nagkuha dayon mi og pagkaon nga spaghetti, ang langaw gi-adto sa spaghetti, gi-adto sa tae, gi-adto sa spaghetti,” dugang niini.
Dako ang pasalamat usab sa tinugyanan sa CHO sa positibong pagtubag sa katawhan ug sa mga Barangay sa ilang tumong nga malayo sa mga sakit ang tanang residente ug katawhan sa siyudad.
Padayon usab sila nga nag-aghat ilabi na sa ubang mga Barangay nga dili pa tanan ang duna’y mga pansayan.