PUNTERYA ni Bert Batawang (45-14-3, 37KOs) nga tumbahon si Mexican Ulises Solis (29-2-2, 20KOs) sa ilang rematch karong Marso 6 sa Mexico.
Ang away, nga usa ka world title eliminator, maoy giingong katapusang kahigayunan ni Batawang aron matuman ang iyang pangandoy nga mahimong world champion.
Ang modaog ning awaya maoy makigharong sa bag-ong IBF light-flyweight champ Carlos Tamara, kinsa maoy nag-ilog sa korona ni Brian Viloria sa miaging semana sa Cuneta Astrodome.
“Tan-aw nako atong last fight namo nga modaog gyud unta ko pero nagisian lang ko. Karon di na ko maghuwat nga magisian, ako siyang tumbahon kon makakita ko’g chance,” matod ni Batawang.
“Dili lang ko mosalig og maayo pero paninguhaon gyud nako nga ma-knockout nako siya.”
Ang manager ni Batawang nga si Sammy “Don King” Gelloani nagkanayon nga mas madasigon ang iyang 38 anyos nga boksidor ning higayuna.
Gipasabot ni Gelloani nga sa premirong away, kuwangan og ensayo si Batawang.
“Katong last fight nila, kuwangan og training si Bert pero tan-aw nako, modaog gyud unta siya ato kon wala pa naundang away,” matod ni Gelloani.
Giklaro ni Gelloani nga iya nang gisultian daan si Batawang nga kon mapilde, hayan iya na gyud kining paretiruhon sa hingpit.
“Actually, motivated kaayo si Bert karon kay he knows that this will be his last chance. Kon mapilde siya, retire na gyud siya,” pasabot ni Gelloani.
“Pero nagtuo ko nga ma-world champion pa gyud ni si Bert bisan sa iyang edad.”
Sa kasamtangan, gisugdan na ni Batawang ang iyang hugot nga ensayo sa iyang gym sa dalan Panganiban.
Inig sugod sa sparring session, nagkanayon si Gelloani nga motapon na sila sa IPI gym sa Mandaue City.