HUMAN nakaharbat og duha ka bulawan sa unang adlaw niadtong Agosto 11, ang Philippine National Police (PNP) Maritime midugang og lain pang tulo ka bulawan sa 2nd Kadayawan Dragon Boat Festival 2018 niadtong Dominggo didto sa Sta. Ana Pier, Ramon Magsaysay Avenue, Davao City.
Ang PNP Maritime, kinsag miabot gikan Manila sakay sa C-130, mihari sa 200-meter open small, 200m mixed small ug 200m open standard categories aron makompleto ang ilang kampanya dinhi sa dakbayan sa kinatibuk-ang lima ka bulawang medalya.
Mirehistro ang PNP og 57.72 segundos batok United Paddlers Club (58:09), kauban-PNP (58:80) ug Bugsay Marajao (1:01.53) sa 200m open small category.
Ang tim mioras og 59.73 seconds aron matagak ang Kujaw Tiger Dragons sa Surigao del Sur (1:00.88), Polilio sa Quezon Province (1:02.21) ug Butuan Dragons (1:19.40) sa 200m mixed small event.
Mikampeyon sab sila sa 200m open standard category human mihuman og 54:29 nga gisundan sa Polilio (54:29), Hiraya Minokawa (56.75) ug Dragons del Sur (58:36).
Samtang ang Kujaw Tiger Dragons maoy nakakuha sa 200m women's small title nga mitala og 1:09.09 kontra Dragons del Sur (1:14.03), Dragon Warriors (1:14.60) ug Butuan Dragons (1:15.64).
Ang Polilio (56:06), ang nanguna sa 200m mixed standard diin ikaduha ang Kujaw Tiger Dragons (59:03), Dragon Warriors (59:76) ug Dragons del Sur (1:00.56) ang misunod sa puwesto. (Marizz R. Perez)