KARON lang bulana, grabe ang nasinatian nga mga pag-ulan didto sa Luzon. Daghang mga lugar ang gibahaan ug duna pay midahili nga mga yuta.
Tungod niini, daghang mga kaigsuonan natong mga Pinoy ang namakwit aron nga malikay sa katalagman.
Daghan sab nga mga biyahe sa eroplano ug pantalan nangatanggong tungod sa di maayong kahimtang sa panahon tungod sa nasinati nga habagat.
Apan taliwala niini, nagpahimangno ang Philippine Atmospheric, Geophysical and Astronomical Services Administration (Pagasa) nga posibleng masinati sa Pilipinas ang El Niño una mahuman ang tuig kasamtangan.
Kini mismo ang gikanayon ni Ana Solmoro-Solis sa Climate Monitoring and Prediction sa ahensiya tungod kay nakataas sa El Niño watch ang ilang monitoring system.
Ang nasinati mismo nga habagat sa nasud ning bulana, indikasyon matud pa sa El Niño.
Gi-ehemplo niini ang nasinati niadtong Hulyo kon diin dunay “above-normal” level ang pag-ulan sa nasud.
Tingali sakto ang Pagasa sa iyang pagbanabana. Kay kon unsa ka basa ang daghang mga lugar sa Luzon, grabe sab ang kauga nga atong nasinati dinhi sa dakbayan sa Davao ning panahona. Halos pila na ka semana nga wala ta makasinati og ulan. Duna man tuoy aksiyon nga moulan apan di gyud makabasa kay motuang man dayon. Mora og gisuyop sa Luzon ang mga ulan dinhi sa dakbayan.
Daghan nang mga mag-uuma ang nag-ampo nga moulan og kusog-kusog aron nga makatilaw intawon og tubig ang ilang pananum. Kay bisan gani og kita nga di mag-uuma, nagtinguha man nga moulan gumikan kay init na gyud ang panahon. Di susama sa miaging mga bulan nga mobundak gyud og kusog ang ulan.
Nag-El Niño na kaha dinhi?