ALAMADA, North Cotabato -- Patay ang usa ka bata-on nga lalaki human gipahit sa King Cobra alas 11:20 sa buntag niadtong Martes.
Giila ang biktima nga si Nicole Acuña, 15, molupyo sa Sitio Lubog, Barangay Rangayen, Alamada.
Sa taho gikan sa kapulisan sa Alamada, nasayran nga nangayam og binaw ug baboy ihalas ang biktima sa lati, unahan sa ilang balay, uban ang iyang mga silingan.
Apan kalit lang siyang misiyagit ug nangayo og tabang.
Abtik nga nagresponde ang mga kauban ni Acuña ug ila pa nga naabtan ang halas nga nakapaak sa biktima sa tuo nga bukton hinungdan nga ila kining gitigbas, patay.
Gisapupo ang batan-on sa iyang mga silingan ug gidala ngadto sa Alamada District Hospital apan patay na kining nahidangat sa tambalan.
Mikatag na sa lawas sa ulitawo ang lala sa halas nga maoy hinungdan sa iyang kamatayon.
Kahinumdoman nga daghanang King Cobra na ang napatay sa mga mag-uuma nga naglublob sa lasang ilabi na sa tiilan sa Mount Apo.