Balak: Kahimanang moderno

Alcea Maniningo

Cangyan, Carmen, Cebu

Lalakeng sugarol mamirinda og purol

Babayeng nagbisyo, lawas ug prinsipyo

Nilamwas sa ulo. Sapi nga puhonan

Bililhong hiyas ang gitahan.

Mga gagmayng bloke gikupay

Debuhong mga hulagway gihan-ay

Sa ilawom sa lamesa

Mga tiil nagkinuhitay.

Kahimanang moderno

Naghugong daw hagong

Kahon nga may hulagway

Makiniliyang de alambre

Ikabit sa kuryente.

Tanang dapit ning yuta

Way di makita

Way gilay-ong di masud-ong

Way kaalam di mabuksan

Way sekretong ilang malilong.

Way nakakita way testigo

Apan nganong nabisto?

May pako ang inagulo

May dunggan ang hangin

May dila ang hinuyuhoy

Molitok sa tinagong hitabo

May mata ang mga bato.

Nagpasiklap ang mga bulak

May selpon ang mga guryon

Naglaraw ang mga alindanaw

Nag-alubang mga alibangbang

Nagkuyog-kuyog mga buyog

Nagpanglili ang mga balili.

Tinago ug dautang buhat

Kalipayng kinawatkawat,

Way nakakita way testigo

Apan nganong nabisto?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph