DEAR Noy Kulas,

Usa ako sa mga nagsubay sa imong lindog sa Sun.Star Superbalita.

Ganahan kaayo ko sa imong mga tambag. Nag-email ko nimo aron matambagan sad ko nimo sa akong problema nga bisan kanus-a wa nako gi expect nga mahitabo sa akong kinabuhi. Just call me Miss Foolish, 24, Filipino diri sa Canada.

Ang problema nako, Noy Kulas, mahitungod sa akong gibati karon sa guy nga nakaila nako sa Internet. He is 23 years old, nagtrabaho sa internetan. Tawga lang siya sa ngalan nga Mr. Mystery Guy. I’ve known him when I was deeply hurt by my ex boyfriend last October. So, di pa kami dugay nagkaila sa Net. Sa tibuok nako kinabuhi di ko ganahan mag-chat tungod lagi kay daghan mga binuang lang pero tungod sa kalagot nako nisulod ko og chat room. So, didto nako nakaila si Mr Mystery Guy.

Click here for stories and updates on the Sinulog 2010 Festival.

Nice kaayo siya unya napakatawa ko niya bisan pa man sa sakit nga akong gibati tungod sa akong ex. Naa siyay sense of humor nga ganahan kaayo ko. Sugod ato pirme nami mag-chat. Tungod niya nakalimtan nako akong ex boyfriend. Na-feel nako nga siguro siya ang guy nga alang gyud nako. He knows everything about me, my job here in Canada kay usa man ko ka manager sa dakong kompaniya diri.

Kahibawo siya nga bag-o pa lang ko nakigbuwag sa akong ex tungod kay nasakpan nako nga naa siyay laing uyab. Kahibawo siya sa tanan tungod kay gisulti nako niya ug gisulti sad niya nako nga single pa siya ug daghan pa. Nanguyab siya nako apan wala ko siya gisugot tungod sa mubong panahon pagkaila namo ug tungod sad kay wa pa kami magkita in person. So, okay ra sad siya apan always niya gi remind nako nga love daw ko niya.

Noy Kulas, ang mga pangutana nako mao ni 1) Dapat ba kaha ko motuo niya? Basin og gibinuangan lang ko niya kay kahibawo na ka sa mga kabuang sa Internet karon 2)Unsa man akong buhaton para motuo ko nga seryoso siya? Mag chat mi 3 to 4 hours halos kada adlaw mao nga na-develop ko samot niya 3) Dili ba kaha siya minyo? Basin og chat lang siya nako aron padad-an nako siya og kwarta or anything that he can get from me kay kahibawo ko kon iya kong pangayuan mohatag ra ba ko. Apan wala pa sad na nahitabo. Wala man sad siya nangayo og unsa.

Please, Noy Kulas, tambagi ko sa angay nakong buhaton kay naglibog na ko ani niya. Sugton ba kaha nako siya? Hinaot matambagan ko nimo.Please don’t print my email. Salamat kaayo, Noy Kulas. More power to you and God bless you and your family.

MS. FOOLISH

Ms. Foolish,

Daghang salamat sa imong e-mail nako. Maayong adlaw diha ninyo sa Canada.

Ako bitaw tig-chat man ko usahay. Kon dunay mo-request nako sa rojval69@yahoo.com nga maoy akong gigamit sa YM, di man gyud nako I-reject. Kay I feel insulto man sab gud na sa nag-request.

Di sab ko motuo nga tanang tawo nga nag-chat magbinuang lang.

Ako bitaw kon mag chat serious man ko. Naay magpatambag sa chat lang. But di ko kadugay kay pwerteng daghanang magdungan.

Sa imong problema ug pangutana, mao ni ang akong tubag. Una, matubag nimo na kon modugay ang inyong chat ug panaghigalaay nga wa siyay pangayuon. Sakto ka, ayaw dayon paglayat kay wa pa kaayo mo magkaila. Ikaduha, huwata kon moaguwanta siya.

Basin pareho mong duha, naa pa mo sa stage of euphoria, mao nang feel ninyong nagkahigugmaay mo. Palabya una ang dugang pipila ka mga buwan.

Kon minyo siya, masuta ra sab na nimo kon magtawganay mo sa cellphone. Mahadlok man gyud na siya, so, limitado ang mga oras sa tawag. Palabya ang unang panahon. Matubag ra ang imong mga pangutana ug pagduda.

NOY KULAS