LIMA na ka mga tawo ang nakabsan sa kinabuhi gumikan sa rabies sa probinsya sa Misamis Oriental.
Gibutyag ni Provincial Health Officer Dr. Jerry Calingasan nga kon itandi niaging tuig moabot sa tulo ang natala nga namatay gikan sa lungsod sa Claveria, Lugait ug Gingoog City sugod sa bulan sa Enero hangtod bulan sa Disyembre.
Apan ning tuig sa 2018, gikan sa Enero paingon sa Hulyo miabot na sa lima ka tao ang nakabsan sa kinabuhi duha niini gikan sa lungsod sa Initao, usa sa Gingoog City, usa sa Tagoloan ug isa sa lungsod sa Naawan.
Matud ni Calingasan nga kining tanan gisusi og maayo ug positibong gikamatyan ang rabies.
Tungod niini, nagpahimangno si Calingsan sa katawhan nga pabakunahan ang mga binuhing mananap aron dili na mosaka ang ihap sa mga nakalas nga kinabuhi.
Ning tuiga, ang PHO nagpahigayon og kontra rabies ngadto sa 12,210 ka tawo sulod lamang sa pito ka bulan nga gipahigayon sa Animal Bite Treatment Center sa nagkadaiyang lungsod sa probinsya.
Bukas usab kanunay ilang buhatan sa paghatag og anti-rabies vaccines niadtong mga mapaakan og mananap.
Si Provincial Veterinary Officer Dr. Benjamin Resmasa sa iyang bahin iyang gibutyag nga ilang gipalapdan ang kampanya batok rabies lakip na ang pagkapon ug pagtangtang sa matris hilabina sa mga iro nga delikado nga makapaak.