WALA matud pa nagkulang ang Barangay Carmen sa pagpahimangno ug pagpatuman sa balaod sa saktong paglabay sa basura ngadto sa ilang constituent.
Apan ang City Local Environment and Natural Resources Office (Clenro) mihulagway sa Barangay Carmen nga usa sa badlungon nga barangay tungod kay bisan asa lang ipanglabay sa ilang residente ang ilang basura.
“Pinakabadlungon gyud Carmen sa tinud-anay lang, dako kaayo siya nga Barangay, dako kaayo siya’g constituents, lu-ag kaayo siya og land area, daghan pa gyud kaayo nga badlungon nga katawhan,” pahayag ni Edgar Naguio, IEC team sa Solid Waste Management (SWM) program.
Gibutyag ni Kagawad Kristian Dale Dabatian, sa Barangay Carmen SWM, nga giabusahan sa katawhan ang ilang gidesinyo nga collection scheme ug mga pick-up points.
Giingong ang gihimong mga pick-up points alang lamang sa mga residente ug wala’y labot ang mga dagkong establistamento apan galabay kini lakip na usab ang mga kasikbit nga mga Barangay.
“Well it’s true maskin unsaon man gud for the past years grabe ag atong pag edukar, abuse gihapon kay atong uban nga mga silingan nga adjacent Barangay didto na gapamilin sama didto sa Macanhan” pahayag ni Dabatian.
Giingong pipila na usab ka mga residente ang nasapon nga naglabay og basura sa dili labayanan apan igo lang moingon nga abi nila og walay nagbantay.
Dugang niini nga wala sila nagkulang sa pahimangno ug aduna usab silay environmental patrols nga maoy manakop kong adunay masakpan nga magpataka og labay og basura.
Anaa sa P1500 ang multa sa madakpan.