ANG tim Sarabia ang nagpabilin nanguna sa nagapadayong Davao City Bowlers Association (Daciba) 33rd Kadayawan Duckpin Bowling Tournament sa Doverlanes and Recreation Center nga gisugdan niadtong Miyerkules gabii, Agosto 15.
Kini human sa upat ka duwa, nakatumba na sila og kinatibuk-an 2,251 pinfalls.
Anaa gihapon sa ika-duhang puwesto ang MLC Warriors nga mitabla sila sa Sarabia og 2,251 pins samtang nailog sa Diagold ang ika-tulong puwesto nga miiskor og 2,201 ug ikaupat ang MLC Warriors 2 nga dunay 2,177 pins.
Naharbat sab sa tim Sarabia highest team single nga 593 pins apan nakuha sa MLC Warriors 1 ang team double nga mipaligid og 1,137 pins.
Napabilin sab ni Jun Auza ang highest individual single (144), double (260) ug average nga 130 samtang si Rose De Guzman ang midaug sa highest pinning nga miiskor og 94 pins.
Ugmang adlawa, himuon ang uwahing eliminasyon dayon sa Dominggo ang semis padulong sa kampeyonato sa samang venue.
Mga modaug sa torneyo makadawat og premyong kuwarta ug tropeyo gikan sa suporta sa lokal nga panggobyerno pinaagi sa Sports Development Division Office. (Marizz R. Perez)