PIKIT, North Cotabato -- Patay ang usa ka mag-uuma nga gipusil sa mga armadong grupo alas 3:15 sa hapon niadtong Miyerkules, Agosto 15.
Giila ang biktima nga si Monana Laba, 23, ug molupyo sa Barangay Bualan, Pikit.
Gibutyag ni Pikit Chief of Police, Chief Inspector Romy Castanares nga nananggi og mais ang biktima sa iyang uma sa Purok 3, Barangay Bualan sa dihang nahitabo ang pagpamusil kaniya.
Sumala pa nga kalit lang siyang giduol sa lima ka mga wala mailhing mga armadong lalaki ug gipusil gamit ang M16 Armalite rifles.
Patay on the spot si Laba nga nakaangkon og daghang igo sa nagkadaiyang bahin sa lawas.
Samtang mga suspek daling misibat human makatimaho nga nagresponde na ang mga miyembro sa Barangay Peacekeeping Action Team.
Imbestigasyon sa kapulisan sa hitabo nagpadayon. (Edgar E. Fuerzas)