GI-INSISTER niadtong Sabado ni Department of Justice (DOJ) Secretary Menardo Guevara nga si Peter Lim ania pa sa Pilipinas. Wa hinuon niya itumbok kon haing dapit sa nasud mahimutang o kaha nagtago si Lim.
Duna akoy nadawat nga impormasyon nga si Peter ug ang iyang manghud si Wellington Lim tua na sa Estados Unidos (US). Si Wellington mao kadtong girakrakan sa wa hiilhing mga tawo samtang diha sa sulod sa iyang sakyanan sa parking lot sa Infinity KTV Bar nga ilang gipanag-iya. Wa hinuon siya maunsa tungod kay bullet-proofed ang iyang gisakyan. Wa usab siyay hold departure order tungod kay wa siya maapil sa kaso sa iyang maguwang.
Ang gibasihan sa DOJ mao ang impormasyon gikan sa Bureau of Immigration (BI) nga si Peter mibalik dayon human migawas sa nasud niadtong Marso. Sumala usab sa tigpamababa ni Lim nga si Jun Fuentes nga ang iyang amo ania pa sa Sugbo. Wa hinuon siya makasiguro kon mo-surrender ba kini ngadto sa mga tinugyanan sa balaud. Si Criminal Investigation and Detection Group (CIDG) 7 Regional Director Supt. Lito Patay mikompirmar nga ila nang gipangita si Peter Lim.
Ania ba gyud si Peter Lim dinhi sa Pilipinas? Kon isug siyang moatubang sa CIDG nga maoy modakup o kaha mopatay kaniya, dili siya molayas apan kon buot siyang mulikay sa mga mananakop sayon alang kaniya ang paglupad sa bisan asang dapit sa kalibutan kay wa man siyay hold departure order hangtud miguwa kadtong warrant of arrest alang kaniya.
• • •
Kulba-hinam kining sitwasyon karon ni Kongresista Gwen Garcia. Ang Office of the Ombudsman mihukom nga tangtangon siya sa pwesto tungod sa unauthorized P24.47 contract alang sa pag-abuno sa Balili property niadtong 2012. Apan ang maong desisyon sa Ombudsman wa ipatuman ni kanhi House Speaker Pantaleon Alvarez. Ang iyang motion for reconsideration (MR) gibasura usab sa Office of the Ombudsman. Sumala ni Garcia nga iyang ipasaka sa Court of Appeals (CA) ang maong kaso. Hugot ang iyang pagtuo nga pulitika maoy nagpaluyo niining desisyon sa graft court. Sumala niya nga si kanhi ombudsman Conchita Carpio-Morales suod nga higala ni kanhi Supreme Court chief justice Hilario Davide, Jr., amahan ni Gobernador Hilario Davide III. Angayang masayran nga ang hukom sa Ombudsman wala lamang magtangtang kang Gwen Garcia kon dili apil ang perpetual disqualification from holding public office. Sa laktud nga pagka-sulti, kon matuman kining maong desisyon, dili na siya makadagan pagka-gobernador o sa bisan unsang posisyon sa gobiyerno. Hayahay kaayo ang kandidatura ni Davide.
Ang gi-atangan karon sa katawhan sa Sugbo kon unsa ang aksiyon ni Speaker Gloria Macapagal Arroyo sa kaso ni Gwen nga maoy nag-preside sa kontrobersiyal nga session sa kongreso diin napulihan gayud si Speaker Alvarez. Kompiyansa hinuon kaayo ang mga pariyente ni Kongresista Garcia nga dili makahimo pagpatangtang kaniya si Speaker Arroyo tungod kay daku kaayo og utang kabubut-on ang mga Macapagal sa Garcia family. Abangan. (msr1144@yahoo.com)