ANG kapulisan sa syudad sa Sugbo nagpanikad na sa pagsikop sa Sugbuanong magpapatigayon nga si Peter Lim. Kini human luwati ni Judge Gina Bibat-Palamos sa Regional Trial Court Branch 65 sa Makati City niadtong Augusto 14, Martes, ang orden de arresto batok kang Lim sa kasong “conspiracy to commit illegal drug trading.”
Ang huwes niluwat sa warrant of arrest batok kang Lim tungod sa gipasakang kaso sa Department of Justice batok kaniya sa usa ka kalapasan sa Republic Act 9165, ang Comprehensive Dangerous Drugs Act of 2002.
Ang gibasiha sa DOJ mao ang testimoniya sa self-confessed drug lord nga si Rolando “Kerwin” Espinosa Jr. atubangan sa Senado nga nagtumbok kang Lim nga usa sa iyang mga suppliers sa illegal nga drugas.
• • •
Apan unsaon man pagsikop sa kapulisan ni Lim nga hangtod niadtong Miyerkoles sa gabii wa pa man moabot ang opisyal nga kopya sa warrant of arrest sa mga tinugyanan sa balaod dinhi sa Sugbo?
Si Chief Supt. Debold Sinas, Police regional Office (PRO) 7 director, niingon nga usa ka staff sa Makati City RTC ang mohatod sa kopya sa orden de arresto ngadto sa Mabolo Police Station ug sa Criminal Investigation and Detection Group (CIDG) 7.
Apan ang pangutana mao, ania pa ba kaha si Lim dinhi sa syudad ug lalawigan sa Sugbo? Si Dioscoro “Jun” Fuentes, ang tigpamaba ni Lim, niingon nga wa na siyay contact ni Lim sukad sa miaging buwan.
• • •
Di pa kita makahisgot sa merito sa kaso nga gipasaka batok ni Lim kay anaa na kini sa hukmanan. Ang atong ikapangutana mao kon asa na man kaha si Lim karon? Atubangon ba niya ang kaso ang gipasaka batok kaniya o molihay lang una siya?
Sumala sa taho sa Sun.Star Cebu, ang warrant of arrest nag-ingon nga si Lim anaa magpuyo sa No. 12 Tres Borces Extension in Barangay Mabolo, Cebu City. Usa ka katabang sa panimalay ni Lim niingon nga taud-taod na niyang wa makita si Lim.
Usa ka opisyal sa Bureau of Immigration (BI) sa Mactan-Cebu International Airport (MCIA) niingon nga wa silay record nga si Peter Go Lim nibiyahe sa abroad. Pero kapin sa usa ka gatos ang Peter Lim sa tibuok nasod. Moabot na unya ang warrant, pero morag wa nay Peter Lim. Gawas kon mokablit siya sa pulis ug moingon, “Dia ra ko.”