GIBUTYAG sa “kanhi laos nga pulitiko” nga politically motivated ang nadawat niyang pagpanghulga. Matod pa nga ang iyang kaatbang sa pulitika maoy naghatag og sayop nga inpormasyon ngadto sa kapulisan ug ni Presidente Rodrigo Duterte nga gusto siyang ilambigit sa kalihukan sa illegal nga drugas.
Ang pagpatay sa iyang kanhi close in security nga si SPO1 Adonis Dumpit didto sa Bohol sa mga kamot sa National Bureau of Investigation (NBI 7) og sa Regional Intelligence Division (RID) ug ang pagsuway sa pag-ambush ni Tejero barangay councilor Jessielou Cadungog adunay koneksiyon sa ilang mga hulga nga nadawat.
Kon maghisgot kita og politically motivated, wala kitay laing matumbok mao ang iyang mga kaatbang nga sila si kanhi Mayor Mike Rama ug Vice Mayor Edgardo Labella. Iyang gitumbok ang usa ka “Dino” apan wala mohatag sa kompletong pangalan. Buot ba niyang ipasabot si Presidential Assistance for the Visayas Michael Dino? Dili pod siguro na mahimo ni Dino. Kon pulitika ang duwa puwede siguro apan pagpanghulga, di katuhuan.
Dili siguro na usab mahimo ni Rama gumikan kay siya mismo nagpas-an og dakong problema kay siya mismo gihinganlan og drug protector sa Presidente. Gawas pa wala siyay koneksiyon sa kasamtangan nga administrasyon. Labaw pang dili usab na mahimo ni Vice Mayor Labella kay dili man na gusto og away ang bise mayor.
Pero mao lagi na ang akong giingon sa mga una natong lindog nga kon wala siya mahilambigit sa illegal nga kalihukan sa drugas, wala siyay angayan kabalak-an. Ang mga narco-politicians lang ang angayan mabalaka sa ilang siguridad. Kontrolado pa niya ang kapulisan bisan kon nagkasungi sila og sa mga opisyal sa kapulisan. Iya bang kahaludkan nga pulis ray mo-unay niya og likidar.
(bobbygnalzaro@gmail.com)