SUGOD niadtong Agusto 15 ning tuiga, ang mga konsumidor sa Metropolitan Cebu Water District (MCWD) nga naputlan sa ilang linya sa tubig mahimo nang mobayad sa ilang bill sa online ug offline payment centers.
Gihimong mas sayon sa MCWD para sa ilang konsumidor ang pagbayad sa ilang bill aron mahimo silang moadto sa payment centers kung sirado na ang MCWD main office, bisan sa Sabado, Dominggo og holidays. Ma-process dayon ang reconnection.
“Service-oriented ang MCWD mao nga mohimo gyud ta og mga programa nga makatabang sa atong mga konsumidor,” matud ni MCWD General Manager Jose Eugenio B. Singson Jr.
Sa pagkakaron, ang mga naputlan sa ilang linya sa MCWD makabayad ra sa MCWD main office, gikan sa 7:30 a.m. hangtud 4 p.m., sa Lunes hangtud Biyernes o adto sa pipila ka online payment centers.
“Naminaw mi sa mga hangyo sa among mga customers nga gusto unta mobayad pero di sila kaabot sa office hours,” matud ni Customer Services Group Officer-in-Charge Lian Balbuena.
Pinaagi sa online centers, ang pipila ka mga konsumidor nga naputlan sa ilang linya sa tubig makabayad bisan unsang orasa sa tibuok semana og ma-process dayon ang reconnection sa ilang linya as tubig.
Ang online payment centers kay ang M Lhuillier Colon ug Tabunok branches, Global Pinoy sa Gen. Maxilom Ave., Cebu City ug Guadalupe Cooperative nga Main ug Tabunok branches.
Ang uban online nga payment centers mao ang post offices sa Mandaue (City Hall and Wireless), Talisay, Consolacion (Municipal Hall), Lapu-Lapu ug ang Cebu Central Post Office sa Aduana.
Ang mga dili pa online pero mahimo pud modawat og bayad mao ang EC Pay Group, apil ang 7 Eleven Stores, Gaisano Bros. stores, Metro Retail Stores Group, Prince Warehouse, RD Pawnshop, Fooda Saversmart, Gaisano Grand, H Lhuillier Pawnshop, Prime Asia Pawnshop and Gemmary Pawnshop ug Jewelry, ug uban pa.
Ang CIS-Bayad Centers mahimo pud modawat og bayad sa mga naputlan na sa tubig.
Kining tanan alang sa mas paspas ug kasayon sa mga konsumidor. PR