Dear Papa Joe,
Tagua lang ko sa ngan nga Marnelli, taga probinsiya sa Sugbo pero dia ko karon nagtrabaho sa syudad. Magpatambag ko nimo sa akong problema kay naglabad na kaayo akong ulo.
Parte ni sa akong mama nga gipabuhi og baka sa among kapitan sa barangay pinaagi sa ilang mga proyekto didto. Pero naunsa bang wala man gyud siya tagai bisag piso kon mahalin na ang baka. Katulo na ni nahitabo. Naluoy ko sa akong mama dihang nanawag niya kay naghilak ni kay wa lagi siya bahini.
Tungod sa akong kalagot, nag post ko sa Facebook. Akong gipabuhagay ang akong kasuko nila. Nagyawyaw ko sa Facebook sa ilang gibuhat sa akong mama. Pero nakabasa man diay sila sa akong post unya gipadad-an mig summon kaming duha ni Mama. Tungod kay dia man kog syudad, si Mama ra ang niatubang. Pagsulod niya sa barangay hall, gidayon siyag yawyaw, gikasab-an nila akong mama unya giingnan pa gyud nga og dili ko moatabang, ipa pulis kuno ko nila diri sa syudad.
Unsa may akong buhaton Papa Joe nga di man unta nako sala? Nagsulti ra man kos tinuod.
MARNELLI
Dear Marnelli,
Tinuod nga nagpahungaw ka sa kalagot nimo sa Facebook which is dili gyud sakto. Usa na kini ka leksyon nga dili magbasta-bastag post sa Facebook sa inyong mga kapungot labina gyud og nailhan ka nila, unya nag mention kag mga pangalan ug sa inyong barangay.
Kon ila kang pasakaan og kaso, pwede gyud labina kon na captured nila ang imong post as ebidensiya. Ang akong tambag nimo nga kon pwede mopauli ka sa inyo ug atubangon nimo didto. Tinuod nga nasakitan ka kay wala bahini si Mama nimo sa binuhing baka, pero ingon ka, ikatulo na gibuhat. Nganong pag ikaduha nibuhi pa man siya? Niabot pa gyud sa ikatulo nga wala man kaha bahini. Pauli didto ug pangayog pasaylo. Nakahibawo kong makasabot ra sila nimo.
PAPA JOE
(Sa inyong problema, ipadala sa papajoesuperb@gmail.com)