MAS dako og P5,000 ang charter day bonus nga madawat sa mga casual ug regular nga kawani sa Mandaue City Hall karong buwana.
Kini maoy gipaambit ni Mandaue City mayor Luigi Quisumbing sa dihang nahinabi sa Superbalita Cebu.
Kagahapon, gibalik ni Quisumbing sa konseho ang napirmahan niyang ordinansa human giaprobahan sa ikatulo ug katapusang pagbasa konseho sa miaging semana.
“We increased the charter day bonus from P10,000 to P15,000 for our regular and casual employees,” matod ni Quisumbing ning mantalaan.
Kini maoy unang higayon nga moabot og P15,000 ang bonus sa kawani sa city hall.
Paambit sa mayor nga iya kining gituyo sanglit dako man ang nakolektang buhis sa kagamhanan sa dakbayan.
“We have a significant increase sa collection efficiency nato. So far, of 2018, we’re anticipating an increase in collection efficiency as well. Thankfully, we’ve been able to hit most of our targets in the first and second quarters. The third quarter is looking very promising already. Given that, we decided to increase our bonus,” padayag sa mayor.
Apan way labot sa bonus ang mga job-order (JO) nga kawani sa city hall sanglit di man kini pwede base sa balaod, dugang ni Quisumbing.
Nanghinaot si Quisumbing nga mahatag na unya ang charter day bonus sa hinapos sa buwan diin saulogon nila ang ika-49 nga Charter Day sa dakbayan karong Agusto 30 ning tuiga. JPP