SECTIONS
Saturday, September 22, 2018
SUPERBALITA CEBU

SOCA ni Quisumbing sa session hall lang

GIPAHIBALO ni Mandaue City Mayor Luigi Quisumbing nga sa session hall lang sa city hall siya mohatag sa iyang State of the City Address (SOCA) karong tuiga.

Lahi kini sa mga nilabayng duha ka tuig sa paglingkod ni Quisumbing sa katungdanan diin ang maong kalihukan gihimo kanunay sa mas dako nga City Cultural and Sports Complex.

“It will be a much much smaller event compared to years passed tungod kay the next day man gud is our charter day itself so we want to make sure that we have a bulk of our recognition ceremony etc on the 30th itself,” matod ni Quisumbing sa dihang nahinabi sa Superbalita Cebu.

Ang mayor gikatakdang mohatag sa iyang SOCA karong Agusto 29, usa ka adlaw sa di pa saulogon sa dakbayan ang ika-49 ka nga charter day.

Sa paglusad sa mga aktibidad alang sa charter day sayo ning buwana, adunay awarding ceremony alang sa mga kawani sa city hall nga nipakita og katakos sa ilang pagserbisyo sa city hall human sa SOCA sa mayor.

Apan giusab kini ug gibalhin ang maong kalihukan atol mismo sa adlaw kasaulogan.

Dugang ni Quisumbing nga ubay-ubay ang mga nakalinyang kalihukan sa charter day ning buwana.

Ang mga highlight niini mao ang count down sa golden anniversary sa pagkadakbayan sa Mandaue, pagpakita sa nidaog nga logo sa contest nga gipasiugdana sa dakbayan ug ground breaking sa P1bilyones nga government center sa Mandaue.

Paambit ni Quisumbing nga kompirmado nga si Special Assistant to the President (SAP) Bong Go maoy guest of honor sa charter day ug usa sab sa mga mosalmot sa groundbreaking sa government center.

“We will also be announcing of partial list of some activities leading up to the golden anniversary of Mandaue City,” matod ni Quisumbing.

Sa laing bahin, ang mayor niingon nga nga gawas sa P50,000 nga ganti alang sa makadaug sa logo making contest sa “Mandaue @50”, adunay 10 ka mga nisalmot sa maong kompetisyon nga makadawat og tag P3,000 nga consolation prizes.

Si Quisumbing niingon nga nahuman na sila og pili sa mga finalist og mamanaug sa kompetisyon nga nakadani og kapin sa 30 ka entries.

Makita ang mga napiling entries sa finalists nga gipang-display sa lobby sa Mandaue City Sports Complex ug sa dakong LED board atubangan sa city hall. JPP


VIEW COMMENTS