MIAGI una og overtime una pa nila masakmit ang tagsa-tagsa nila ka kadaugan niadtong Miyerkules sa Maharlika Pilipinas Basketball League (MPBL) Datu’s Cup nga gipahigayon didto sa Olivares gym.
Ang Paranaque ug Pampanga, human sa makutas nga panag-engkuwentro, nagmalampuson sa pagkulit sa kulbahinam nilang kadaugan nga nagpalig-on sa ilang standing sa ilang managlahing division.
Unang mikutlo og kadaugan mao ang Pampanga Lanterns kinsa misandig sa kahanas ni Jong Baloria aron pukanon ang defending champion Batangas Athletics, 80-75.
Sa maong duwa, si Belora mikolekta og 18 puntos, unom ka rebounds ug duha ka blocks nga giayudahan nila nI Michael Juico ug Marlon Gomez nga nagkumboya og 28 puntos, 19 ka rebounds ug 11 ka assists alang sa ilang ikatulong kadaugan sulod sa unom ka duwa.
Samtang sa main game, ang host Paranaque Patriots milampos usab sa pagdispatsar sa Caloocan Supremos, 94-87.
Sa makausa pa, si Harold Arboleda mipakli og 19 puntos, 11 ka rebounds ug walo ka assists nga igon na kaayong nakaaswat sa Patriots ngadto sa 4-2 nga baraha. JBM