GIBATI na karon og kahinam ang Fil-American guard nga si Jordan Clarkson nga moduwa sa Philippine National team sa nagpadayon nga 2018 Asian Games.
Si Jordan wa makaduwa kagahapon sa dihang gikasangka ug gilubong sa Pilipinas ang Kazakhstan tungod kay natayming usab nga mao pay pag-abot niya sa Jakarta, Indonesia diin siya mideritso og tan-aw sa duwa sa GBK Basketball Hall.
Usa sa gikahinaman ni Clarkson mao ang style sa dinuwaan sa Pilipinas nga nakapalingaw kaniya. Dako ang iyang pagtuo nga dali ra siya nga makasubay niini.
“Really good. Fast, get up and down, shoot 3s. A fun style of play,” matod sa 6-5 kansang kaliwat lumad nga taga Pampanga nga nakutloan sa abs-cbnnews.com.
Subling mipadayag si Clarkson sa iyang kalipay nga sa katapusan nahatagan na gyud og katumanan nga iyang damgo nga maka-represent sa bandera sa Pilipinas.
Niadtong Martes sa gabii, si Clarkson nalakip sa laing duha ka nga NBA players sa China nga gitugotan nga makaduwa sa Asian Games bisan ug niining higayona lang.
“I’m just gonna come here and get used to how they do things here. At least we got four days of practice, and I can get used to it,” dugang saysay ni Clarkson. JBM