SUKWAHI sa gikabalak-an, ang Philippine National team yanong milampornas sa Kazakhstan, 96-59, sa ilang unang misyon sa 2018 Asian Games men’s basketball didto sa Gelora Bung Karno Basketball Hall sa Jakarta, Indonesia kagahapon.
Ang 12-2 nga rally sa unang tres minutos sa duwa maoy gihimong tikanganan sa mga Pinoy kinsa nakaposteg 21 puntos sa first half ug nabingat ngadto sa 31 sa second half aron pagsiguro sa kadaugan.
Depensa maoy nakapagusbat sa opensa sa Kazakhstan kinsa nakamugna usab og mga sunodsunod nga turnovers ug wala na gyud maka-recover pa.
Gani sa statistics, ang Kazakhstan nakamugna og 22 ka turnovers samtang siyam lang ang sa Pilipinas.
Si Stanley Pringle, sa iyang unang pagsul-ob sa national jersey, mipakatap og 18 puntos aron pangulohan ang National squad kinsa naporma sulod lang sa duha ka semana.
Ang top rookie sa miaging PBA Draft nga si Christian Standhardinger maayo usab nga nakaduwa ug mikolekta kini og 15 puntos gawas sa iyang mga rebound samtang midugang og 12 puntos si Jame Yap kinsa katapusang nakarepresenta sa nasod niadtong siyam na ka tuig ang nakalabay.
Mitapos usab sa duwa sila si Paul Lee ug Christ Tiu nga may tag 10 ug 9 puntos matag usa.
Si coach Yeng Guiao mipagamay sa tensiyon sa duwa nga mitumaw sa makadiyot tali nila ni Chris Tiu, Stanley Pringle nga nakabingkilay ug sinikhanay ni Rustam Murzagaliyev ug ingon man ang pagpaniko ni Raymond Almazan bisan sa dead ball nga sitwasyon.
“Hindi, hindi. ‘Yung girian na ‘yun, wala ‘yun. Hindi naman girian sa tingin ko ‘yun,” matod ni Guiao. “There were small physical interactions, pero I don’t think it came to a point where it would blow out of proportion or out of control. The referees were specifically trying to prevent anything like that.”
Gani ang mga referees maabtiko usab kaayo nga nakabantay niini.
Sa kadaugan, ang mga Pinoy sa nakasiguro na og luna alang sa sunod round. Ilang ikasangka ang China karong Martes sa alas singko ang takna sa hapon.
Ning higayona, gipaabot nga makaduwa na ang Fil-Am nga si Jordan Clarkson sa Cleveland Cavaliers kinsa kagahapon lang miabot didto sa Indonesia ug mitipon sa bench sa Philippine team nga wa maka-uniporme.
Si Anton Bykov nangulo sa Kazakhstan nga may 13 puntos.
Mga puntos:
Philippines (96) – Pringle 18, Standhardinger 15, Yap 12, Lee 10, Tiu 9, Norwood 7, Almazan 6, Erram 5, Belga 5, Taulava 5, Ahanmisi 4.
Kazakhstan (59) – Bykov 13, Gavrilov 9, Yergali 8, Zhigulin 7, Kuanov 6, Bazhin 6, Chsherbak 6, Maidekin 2, Marchuk 2, Yagodkin 0, Murzagaliyv 0, Satkeyev 0. Quarterscores: 16-9; 41-20; 61-43; 96-59. JBM