GIDALI paghatod sa duol nga bay tambalanan ang usa ka pasaherong sakay sa Toyota pick-up human napasok kini sa Isuzu cargo truck didto sa lungsod sa Bansalan, Davao del Sur.

Subay sa report sa traffic section sa Bansalan Police Office, gimaneho ni Zubair Labanon ang cargo truck (plate number MCS 823) nga gipanag-iyahan ni Suib Ibos sa probinsya sa North Cotabato.

Samtang ang pick-up nagbaton sa plakang LGL 159, gimaneho sa tag-iya nga si Leonardo Cedeno, molupyo sa President Roxas, North Cotabato.

Si Inspector Reniel Raotraot, deputy chief of police, nagkanayon sa Superbalita, nga mga alas 10:45 sa kagabhion, Huwebes, nahitabo ang insidente didto sa Barangay Marber, Bansalan.

"Pareho silang nagdagan towards Digos City direction from Cotabato and then kining pick-up maneuvered to overtake the cargo truck, pagtan-aw niya kay naa may padong na vehicle sa other lane so nibalik sa lugar unya mao na to," ni Raotraot.

Gihulagway nga na-sideswept na sa pick-up ang cargo truck human kini mobalik unta sa iyang lugar mao nga niresulta sa pagka-angol sa pasaherong si Aurelio Bandoy Jr.

Gitabang dayon sa Viacrusis Medical Clinic ang biktima apan dali sab nga gibalhin sa ospital didto sa Digos, human gimando sa mga doktor.

Nasuta nga way samad ang drayber sa maong pick-up gawas lang sa maayong pagkaguba sa iyang sakyanan ingon man sa cargo truck.

"Mga 1:30am na nahulbot ang pick-up maayo na lang kay gabii nahitabo so walay nahitabong traffic," panapos sa opisyal.

Nagpadayon pa karon ang imbestigasyon sa kapulisan kalabot sa aksidente. (Dondon B. Dinoy)