NAHASUBO ang pamilya sa namatay'ng Overseas Filipino Worker (OFW) didto sa lungsod sa Bansalan, Davao del Sur gumikan kay wa gihapon na-iskedyul ang pag-otopsiya sa lawas ni Maria Theresa Seda.

Si Seda giingong namatay human niambak sa 7th floor sa building sa iyang amo didto sa Beruit, Lebanon niadtong Enero 4 mao nga patay na nga nahiuli sa pinuy-anan niini sa Barangay Poblacion.

Di makatuo ang bana sa biktima nga si Errol Seda nga mahimo sa iyang asawa ang paghunos sa kaugalingong kinabuhi mao nga dako ang ilang panaghap nga tinuyuan gyud ang kamatayon sa iyang asawa.

Bisan ang maguwang nga si Helen Miguel nagduda sa report nga gipagula sa otopsiya sa mga otoridad sa Lebanon sanglit ang testigong nibarog nga nahagbong ang biktima, drayber diay sa ugangan sa amo ni Seda, nga si Youssef Hdeib.

Ang taho sa otopsiya nagkanayon nga wa diha ang iyang amo sa dihang nahitabo ang pagkahagbong.

"He (Youssef) and his wife were not at the house upon occurrence of the accident and we know that the Chief Adjutant in the Lebanese Army Khaled El Arab, appeared at the house of Lama Hajjir (amo sa biktima) being the driver of her father in- law, Brigadier General Haffez El Hajjar, in order to send items to their house and the accident occurred after his arrival a few minutes," sumala sa mga otoridad didto.

Sumala sa pamilya nisamot ang ilang pagduda human nasayran nga dunay koneksyon sa gobyerno sa maong nasud ang amo sa biktima.

Nisamot ang kadismaya ni Miguel tungod sa alegasyong negatibo gihapon ang Department of Foreign Affairs (DFA) sa ilang pag-adto sa buhatan niadtong Huwebes, nga maka-angkon sa tinguhang hustisya ang namatay'ng OFW.

"Wala na talagang pag-asa na matulungan kami kasi mahirapan lang daw kami," ni Miguel sa Superbalita.

Unang nangayo ang pamilya og tabang nga ma-otopsiya ang patay'ng lawas sa Municipal Health Office (MHO) sa Bansalan, apan balibad gihapon ang ilang nadawat.

Bisan ang lokal nga gobyerno igo lang nihatag og gamay nga tabang pinansiyal kinsa giingong di paigo sa pagpalubong sa biktima.

Buot unta nilang modangop sa National Bureau of Investigation (NBI) alang sa pag-otopsiya apan sa dihang nihangyo og tabang sa DFA, matod pa nga giingnan sila nga sila mismo mao ang mobayad aron maipalawom sa otopsiya ang biktima. (Orlando B. Dinoy)