MITAHAN sa ilang kaugalingon ngadto sa militar ang ubay-ubay ka mga sakop sa Civilian Volunter Organization (CVO) sa probinsiya sa Maguindanao.

Sa nahagpat nga taho gikan sa 6th Infantry (Kampilan) Division sa Philippine Army, alas 8:00 sa buntag, Enero 29, nangulo si North Upi Municipal Mayor Ramon Piang sa pag-surender sa mga armas sa iyang mga CVO.

Mga armas gilangkuban sa lima ka caliber 30 bar rifle, 78 ka mga garand rifles ug mga buhing bala nga pormal nga gidawat ni 603rd Brigade Commander Colonel Ernesto Aradanas.

Matud ni Mayor Piang nga gibuhat nila kini isip pagsunod sa direktiba ni DILG Secretary Ronaldo Puno nga sutaon pag-ayo ang mga CVO ug Cafgu sa matag munisipyo sa Maguindanao, lakip na mga armas nga gi-isyu kanila aron masiguro nga wala kini magamit sa dautang pamaagi.

Giklaro ni Aradanas nga ipailawom sa ballistic test ang naasoy nga armas aron sayron kun wala pa kini magamit sa nilabay nga masaker.

Mas gipalig-on pa sa mga otoridad ang paglutos sa mga private armed groups ilabina sa pagpangita sa mga armas ug mga bala nga gipangtagoan sa pamilyang Ampatuan nga gilambigit sa masaker. (Edgardo Fuerzas)