PATAY ang usa ka opisyal sa Department of Education human gipusil sa siyudad sa Cotabato.

Ang kapulisan nag-ila sa biktima nga si Sied Marcial, 44 anyos, minyo, district supervisor DepEd, South Upi, Maguindanao Province.

Base sa taho gikan sa Cotabato City Police Office nasuta nga banda alas 6:40 sa gabii, Enero 28, nagtindog ang biktima sa Sinsuat Avenue, duol sa Cotabato Regional and Medical Center kay dunay gihulat nga kauban sa trabaho.

Apan kalit kining giduol sa duha ka wala mailhing mga suspek ug gipusil gamit ang kalibre .45 nga pistola.

Patay diha dayon si Marcial kinsa naigo sa iyang ulo ug dughan samtang ang mga mamumuno dali nga miiskapo sakay sa motorsiklo paingon sa wala matino nga direksyon.

Matud ni Angie nga una gipatay ang iyang amahan, dunay nadawat kining mga hulga sa iyang kinabuhi bahin sa trabaho niini.

Nagtuo sab si Cotabato City Police Director Sr. Supt. Willie Dangane nga posibling may kalabutan sa posisyon sa biktima ang motibo sa pagpatay.

Ang kapulisan padayong nag-imbestiga aron gyud masuta ang tinuod nga motibo sa hitabo ug sa ingon madakpan ang mga suspetsado. (Edgardo Fuerzas)