KRITIKAL karon ang kahimtang sa duha ka mga pintor sulod sa tambalanan human sila nahulog sa gambalay nga ilang gitrabaho niadtong Huwebes.

Ang insidente nahitabo sa alas 4:00 sa hapon didto sa Stella Marris, N. Torres Street, Bo. Obrero, siyudad sa Davao.

Gitambalan karon sa San Pedro Hospital mao sila Ruel Pelonita, 40, minyo, nagpuyo sa Libugao, General Santos City ug Jerry Ayuba, 26, minyo, nagpuyo sa Barangay Tigatto, distrito sa Buhangin.

Si PO3 Richard Dionisio, imbestigador sa Sta. Ana Police Station, nagbutyag sa iyang spot report nga namintura ang mga biktima sa maong gambalay dihang aksidente silang nahulog.

Giingon nga si Pelonita didto namintura sa ikatulong andana apan nawad-an siya og balanse mao nga nahulog siya ug aksidenteng naigo si Ayuba nga didto sa ikaduhang andana.

Si Ayuba, dihang naigo sa lawas ni Pelonita, nahulog sab gikan sa iyang nahimutangan ug mitugpa sa ground floor sa building.

Ang duha gidala didto sa Davao Medical Center (DMC) apan tungod kay grabe ang ilang kahimtang gibalhin sila sa San Hospital.

Mga biktima miangkon sa kapulisan nga wala silay safety gear alang sa ilang kaugalingon samtang nagtrabaho sa maong building. (AD)