ANG buhatan sa kapulisan sa lungsod sa Kapalong, Davao del Norte padayon karon sa paghimo og makuting imbistigasyon aron sayron kung kinsa ang suspek sa pagtagud-tagud sa lawas sa usa ka Ata-Manobo nga gipaanod sa Kipaliko River, didto sa Purok 17, Barangay Sampao, sa maong lungsod.
Sumala pa ni Police Chief Inspector Jimmy Palomar sa Kapalong Municpal Police Station, atol sa paghinabi sa mga sakop sa media, nga ila pang gisusi og maayo aron ilhon ang nagpatay sa biktima nga si Udang Basong, 40, ug molupyo sa Sityo Nasiko, Barangay Sto Nino, lungsod sa Talaingod sa Davao del Norte.
Sigun sa police report nga ang biktima napalgang wa nay kinabuhi nga naglutaw sa sapa alas 2:45 sa hapon niadtong Miyerkules.
Ang biktima napalgan ang lawas nga wa nay ulo ug wa na sab ang duha ka mga bukton niini ug napuno og mga samad dinunggaban ang kalawasan.
Ang gisul-ob lamang nga shortpant sa biktima maoy nahimong basihan sa mga kabanay sa pag-ila sa biktima.
Tulo ka mga adlaw nga nawala ang biktima sa ilang panimalay una kini napalgang patay.
Nagtoo si Palomar nga posibling sa sikbit nga lungsod gipatay ang biktima ug gipaanod lamang sa sapa padulong sa Barangay Sampao.
Apan mga paryente sa biktima nagtoo nga mga Bisaya sa nahisgutang barangay ang ilang gidudahan nga suspek.
Luyo sa hitabo, gimaymayan na lamang sa kapulisan ang mga kabanay nga dili ipanimalos ang kamatayon sa biktima pinaagi sa 'pangayaw' ug isalig ang pagkab-ot sa hustisya sa mga otoridad.
Matud sa mga otoridad nga angay ipatigbabaw gihapon sa mga kabanay ang pagkab-ot sa hustisya sa legal nga pamaagi subay sa balaod.
Kapulisan sa lungsod sa Kapalong mihimo karon og pakigbuligay sa kapulisan sa lungsod sa Talaingod aron masikop ang suspek.