Suwayan ta!

BAG-O pa lang gani gimugna sa kapolisan sa Cagayan de Oro ang usa ka special unit alang sa dali nga kasulbaran sa mga kremin nga mao ang City Intelligence Unit (CIUD), usa dayon ka dako-dako nga pagpanulis ang nahitabo niadtong Huwebes sa buntag.

Duha ka mga empliyado sa PICMAW, sa Jasaan, Misamis Oriental ang nag-withdraw sa maong kantidad sa Rizal Commercial Banking Corporation (RCBC) ning siyudad aron i-suweldo sa ilang mga trabahante. Paggawas sa bangko, nagbaklay ang mga biktima paingon sa ilang sakyanan mga pipila ka metros gikan sa bangko dihang nahitabo ang pagpanulis. Tulo ka mga batan-on nga armado og kalibre .45 ang mga responsabli ug gipusil pa ang usa ka biktima.

Niadtong niaging semana, naghisgot kita kabahin niining mga pagpanulis nga dayon ikabit sa nagkaduol nga eleksiyon.

Atong hagiton ang atong kapolisan labi na kining mga bag-ong gitahasan nga mga special unit ingon man ang atong bag-ong City director sa Cagayan de Oro City Police Office (Cocpo) sa pagpakitang gilas na!

Makapaalarma gyud

Dili sayon ang mawad-an og minahal sa kinabuhi sama sa mga sakop sa atong pamilya busa angay kita nga mag-aping aron mapugngan ang mga posibling kadaut.

Bag-o lang gibalit ang pagkamatay sa duha ka mga bata tungod sa dengue sa lungsod sa Salay, Misamis Oriental.

Ang mga biktima pulos nag-edad og lima ka tuig kinsa nakabsan sa ilang kinabuhi sulod sa Northern Mindanao Medical Center (NMMC). Bisan ang mga opisyal sa probinsiya naalarma sa maong sitwasyon.

Pagpanglimpiyo sa palibot ang angay natong buhaton aron mapuhag ang mga dapit nga mahimong puy-an sa lamok nga nagdala og dengue.

Akong mahinumduman si Noy Kulas kinsa nakalas usab ang kinabuhi sa iyang anak tungod sa dengue. Atong mabati pinaagi sa mga column ni Noy Kulas ang kasakit nga iyang gibati uban sa iyang pamilya. (Jen L. Besere | Labtik)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph