Nadela: Ang tinuod nga higala

FAIR weather friends.

Mao ni sagad mabati gikan sa mga makinaadmanon nga pangayoan nimo og panahom sa mga sitwasyon nga nanginahanglan ka og tabang.

Ang gipasabot nga kong wa na kay masampit panahon sa kalisdanan nagpasabot kana nga nagpalayo na kanimo ang imong mga higala nga maoy sagad nimong maduolan.

Posibling gusto ka nilang lihayan kay hibatian sila sa imong batasan. Ang laing hinungdan kay wa na silay madawdaw o mapahimuslan gikan nimo tungod sa imong sitwasyon.

Ang sulti sa lain nakong higala kay wa naman silay makuha gikan nimo mao nga napapas kana sa ilang listahan.

Mao ni ang kamatuoran.

Kong mahimo ka pang kapahimuslan daghan ang mosampit sa imong pangalan.

Hinuon ang uban nga di mapahimuslanon nagtamod kanunay sa kabililhon sa inyong panaghigalaay bisan unsa pay mahitabo nimo.

Ako ning gihisgutan tungod sa kasinatian sa laing higala nga matod pa niya human nayabo ang gipamuhanan niya nga negosyo nakamatikod siya nga niislag ang daghan sa iyang mga higala.

Karon nga medyo nauli-ulian og gamay ang iyang negosyo hinayhinay sab nga namalik ang mga konohay die hard niya nga mga higala. Mao nay pait. Og mao ni angay nga kat-onan sa mga batan-on karon.

Ang pagpamarkada di sayop. Ang sayop mao ang pagpataka og pili og barkada.

Ang mga ginikanan instrumento kaayo pag giya sa ilang mga anak pagpili kinsa ang angay ug di angay nga saligan ning panahon karon.

Sa interview sa mga dinakpan nga nalambigit sa krimen ilabi na ang druga, may mga mokompisal nga wa sila magtoo nga ang ilang higala nisud diay sa iligal nga negosyo.

Sa ato pa nadahig lang sila.

Pero uwahi na ang pagmahay kay ang bilanggoan mao na karon ang bag-o nilang pinuy-anan.

Sa politika daghan sab ang napurnada. Nagka utang utang kay pag-abot sa panahon gitalikdan sa ilang mga giilang higala.

• • •

Tungod kay nagkaduol na ang “ber” months o mga buwan nga naghatag og sinyales nga taliabot na ang Pasko, dunay daghang butang nga angay bantayan.

Sa kampanya batok kriminalidad di angay nga mokompiyansa sa mga dayo nga may dautang tuyo sa ilang isig ka tawo.

Tungod sa pagtoo nga modas-ag ang daghang kuwarta sa mga highly urbanized area mao nga sagad motumaw ang alarma sa tulis nga moresulta usahay sa dugoon nga hitabo.

Tungod niini ang PNP mopakli sa ilang mga record unsay angay nga tutukan sa panahon sa “ber” months pagsiguro nga di sila maunhan sa mga tulisan.

Karaan na kaayo ning isyuha.

May bag-o bang diskarte ang PNP o balik ra sa naandan kanang madali-dali nila og tubag sa presscon nga police visibility.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph