DILI halayo ang pangagpas sa negusyante nga si Prisca Niña Mabatid nga pulitika gihapon maoy nagpaluyo niining pagpasaka og kaso sa usa ka maestro nga si Levi Cortez batok sa Pinoy Care nga iyang gipanag-iya.
Si Mabatid, ang napiling kapitan sa Barangay Mabolo, Cebu City kinsa bag-o lang nisulod sa pulitika, gireklamo ni Cortez sa buhatan sa National Bureau of Investigation (NBI) tungod kay modagan na kuno og duha ka tuig ug hangtod karon wa gihapon kini makalarga paingon sa Canada, sigon sa pasalig sa agency nga iyang giaplayan nga mao ang Pinoy Care.
Apan desidido si Mabatid nga mosumbalik og kiha ngadto ni Cortes tungod sa pagguba sa reputasyon sa iyang kompaniya nga giampingan sulod na sa 18 ka tuig.
Iyang gibutyag nga wa makapasar ug ang kakulang sa mga rekisitos ni Cortes maoy rason nganong wala kini makalarga. Ang pagderitso sa maestro sa NBI ug wala una moadto sa iyang buhatan, maoy nakapaduda ni Mabatid nga kini gipulitika.
Dili usab ni maoy unang higayon nga siya nag-atubang og reklamo sukad sa iyang pag-apil sa pulitika. Gipetisyonan usab sa iyiang kaatbang ang iyang kadaugan pagka-kapitan sa Mabolo human gikuwestiyon ang iyang residency sa miaging piniliay.
Lab-as pa usab sa atong panumdoman kadtong nigawas nga kontrobersiya kalabot sa nahitabo sulod sa usa ka inilang hotel sa dakbayan diin iyang gikalantugi ug gikabikil ang hotel staffniini.
Ning bag-o lang, gikataho nga gikuhaan usab siya sa Cebu City Hall og mga garbage truck sa rason nga ang taga City Hall ra usab ang nasayod.
Gihulagway nga si Mabatid usa ka potensiyal nga lider sa Sugbo nga may kahanas ug katakos nga mopadagan sa iyang pamunoan, apan kabag-uhon sa pulitika mitumaw usab ang pagduda makasugakod ba kaha siya niini? Kini maoy dakong pangutana.