Dear Noy Kulas,
Tawga Lang kog Juan, 21 years old.Nahuman na diay kos akoang kurso pinaagi sa tabang sa akoang amahan ug sa akoang mga igsuon ilabina sa akoang ate nga OFW, itago lang nato sa ngan nga Maria.
Ang akong problema mahitungod sa uyab sa akoang ate Maria nga itago lang nato sa ngan nga Hudas.Nagkaila sila sa gawas kay OFW gihapon si Hudas. Si Hudas taga Mindanao, kasado ug naay duha ka anak, apan buwag sa asawa.
Karon nanguli sila ug gidala ni Ate diri sa Cebu si Hudas last year. Di mi ganahan ni Hudas kay grabe ka hambugero ug hilason. Wa mi mo-react kay nirespeto ra mi isip uyab ni Ate Maria.
Naa na sila nagpuyo sa balay kay nahurot ilang savings kay mahal ilang giabangan unya si Ate ra ang nagtrabaho. Si Hudas one year nang way work. Maglagot akoang mama ug usa ka maguwang nakuh kay lainon og batasan. Wa mi kahibawo nganong nag-antos si Ate ani niya. Kon dayoff pa ni Ate, mao pay manglaba. Way gihimo si Hudas diri sa balay ug mao pay reklamador. Ug usa pa, Noy, mosuyop diay ning tawhana. Kahibawo si Ate Maria, apan maora rag wala. Tan-aw nako blind kaayo siya. Bati bayag nawong si Hudas while si Ate Maria gwapa.
Mangayo unta kog tambag, Noy, isip igsuon ug kinamanghuran. Unsa may angay nakong buhaton?Mahadlok ko kay basin mag-away hinuon mi ug istoryahan nako siya. Unsa kahay maayo nakong isulti nga ma advice san pud nako siya og sakto.Daghang salamat, Noy. God bless and more power.
JUAN
Juan,
Sa atong kultura, ang hierarchy sa us aka family member mo-matter. Busa, kay manghod ka man, mas maayo nga ang inyong parents, labina si Mama nimo maoy makig-estorya kang Maria kabahin sa inyong naobserbahan ug wa ganahi. Or kon makigsulti si Mama nimo niya, naa mong mga magsuon pud aron mosuporta sa iyaha. Di sa ingon nga inyong gitabangan si Hudas, apan concern mo sa inyong igsuong babaye nga wa makakita sa negative aspect sa iyang kapuyo.
Ipakita kaniya nga kamong tanan concern sa iyang kahimtang karon ug isulti kaniya ang negative nga kaugmaon uban kang Hudas. Ug di kamo gusto nga mahitumpawak siya sa di maayong ugma tungod lang sa iyang gugma nianang iyang kapuyo. Apil na niini ang hangtod sa hangtod nga panagpuyo kay di sila makasal kon way annulment niini. Unsa man say makuha niya sa tawo nga tapulan ug bisyuso pa.
Basin pa sa kanunay nga pagsulti kaniya, motuhop ngadto sa iyang huna-huna ang negatibong aspeto sa pagkatawo ni Hudas nga iyang gi-neglect kay nahigugma siya. Mao nay giingon nga buta nga gugma.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com