GITUMBOK sa tinugyanan sa Department of Public Works and Highways (DPWH) ang mga rason sa urban flooding nga gakasinati-an sa dakbayan sa Cagayan de Oro.
Gibutyag ni Engr. Leowald Pecore, project engineer sa dakbayan ug sa Misamis Oriental, nga nag-unang hinungdan sa pagbaha sa siyudad mao ang pag-usab sa klima, nangawala na ang agi-anan sa tubig, daan nga mga drainage system ug ang kumonidad nga wala nagpakabana sa kina-iyahan.
“Climate change, ato pud mga existing drainage system locally ug mga creek gipuy-an og mga tawo, ilabay ang mga basura ug gagmay pa gyud siya,” pahayag ni Pecore.
Giingong ang mga kanal nga daan dili na makakaya sa dakong bul-og sa tubig inubanan sa mga basura nga mosulod niini hinungdan sa pagbaha sa siyudad. Nangawala na ang mga agi-anan sa tubig gumikan na usab kay nabarahan sa mga basura.
Gidugang pa niini bisan og unsa ka maayo ang structural features sa mga proyekto kung wala’y kooperasiyon sa katawhan wala gihapo’y gamit ang mga proyekto tungod kay dili man kini maka-sustenar og dugay.
Gikinahanglan usab ang pagpahigayon og deforestation tungod kay kung padayon ang pagpamutol sa mga tanom o puno-an sa kabukiran dinhi gihapon makapaingon sa dakbayan ang dakong bul-og sa tubig nga hinungdan sa pagbaha.