GITUMBOK sa Cagayan de Oro City Health Office (CHO) ang nag-unang barangay nga adunay ubay-ubay nga kaso sa sakit nga gikamatay sa mga katawhan atol sa gipahigayong unang health summit sa Barangay council.
Gibutyag ni Dra. Rachel Daba Dilla, city health officer, nga ang Top 10 nga nag-unang sakit nga gikamatay sa dakbayan mao ang Coronary Artery disease (heart attack) o atake sa kasing-kasing gisundan kini sa pneumonia, cancer, cerebrovascular disease or stroke, hypertensive o high blood pressure, diabetes, vehicular accidents, tuberculosis ug CDPD.
Nag-una ang Barangay Baikingon nga adunay 227 nga kaso sa sakit nga atake sa kasing-kasing gisundan sa San Simon, Nazareth,Macabalan, Macasandig, Bulua, Bonbon, Agusan, Bayanga, ug Poblacion.
Gibutyag ni Dilla nga hinungdan sa maong sakit mao gayud ang istilo sa pagkinabuhi ilabi na diha sa pagkaon nga mao’y rason nga makakuha niining mga sakit. Giingong dili anaron ang mga kabataan nga mokaon sa mga fast food gumikan kay grabe ang sakit nga mahatag niini.
“Tua na dia’y didto ang cholesterol daan, eating habits gyud, mag start gyud sa gamay pa, kana atong mga bata ayaw gyud anara,” pahayag ni Dilla.
Nagpahimangno ang CHO nga kinahanglan gyud nga magpasusi aron nga makabalo nga aduna’y balatian sama na lamang sa highblood nga traydor nga sakit ug uban pa.
Sa sakit usab nga Pneumonia nag-una ang Barangay Besigan nga adunay 173 gisundan sa Puntod, Balubal, Camaman-an,Poblacion, Dansolihon, Bayanga, Carmen, Macabalan, Tignapoloan ug Tuburan. Nag-una usab gihapon ang Barangay Baikingon sa sakit nga Diabetes nga adunay 91 gisundan sa Bonbon, Poblacion, Patag, Tablon, Macabalan, Lapasan, Nazareth, Carmen, Bulua ug Puntod.