MISAKA na sa Top 5 ang dakbayan sa Cagayan de Oro diin niadtong milabay nga tuig anaa kini sa Top 10 sa gipahigayong 6th Regional Competitiveness Summit niadtong Agusto 16, 2018 sa Pasay, Metro Manila.
Si Mayor Oscar Moreno ug mga opisyales sa dakbayan ang midawat sa mga award didto sa Philippine International Convention Center (PICC).
Namahimong Top 5 karong tuig ang dakbayan sa Overall Most Competitive City diin nag-una ang Quezon City, 2nd Manila, 3rd Pasay, 4th Davao, 6th Makati, 7th Pasig, 8th Bacolod, 9th Cebu ug 10 ang Muntinlupa.
Samtang nasakmit usab sa dakbayan ang laing mga awards sama sa Top 1 sa Resiliency diin ika-22 kini niadtong milabay nga tuig kini giingong tungod kay walay natalang casulaties atol sa paglampurnas sa bagyong Venta niadtong milabay nga panahon.
Subling anaa sa Top 5 ang siyudad sa Infrastructure, Top 7 sa Government efficiency diin anaa kini sa Top 16th sa milabay nga tuig ug Top 13 isip Economic Dynamism diin Top 15 kini niadtong milabay nga tuig.
Giingong anaa sa 145 ka siyudad ug 1,363 ka munisipalidad ang partisipante sa Resiliency Category diin nakuha sa dakbayan ang first place.