SECTIONS
Saturday, September 22, 2018
SUPERBALITA CAGAYAN DE ORO

Dongkoy nahagit subling mag-mayor

NAHAGIT nga magpapili pag-usab isip mayor sa dakbayan sa Cagayan de Oro si kanhi Mayor Vicente “Dongkoy” Emano tungod sa sunod-sunod nga mga kaso nga gipasaka batok kaniya karong panahona.

Gibutyag ni Emano nga natingala siya nganong karon lang nanulpot ang mga kaso nga padangaton na ang eleksyon 2019.

Nagtuo si Emano nga ang nagpaluyo niini ang iyang political rival nga si Cagayan de Oro Mayor Oscar Moreno ug nagtuong gihimo daan aron adunay mabalos nga pagpangatake panahon sa eleksyon.

Duha ka mga complainant ang mitumaw ug mipasaka kaniya nga mao sila Ernesto Molina ug kanhi trabahante sa Mambuaya nga si Danilo Daaca ngadto sa buhatan sa Ombudsman.

Si Molina, duha ka kaso ang gipasaka, usa niini ang kalambigitan sa pork barrel scam pinaagi sa non-government organization ug ang usa niini ang kwestyonable pagpagawas sa calamity funds niadtong tuig 2013.

Miakusar sab si Daaca kang Emano nga maoy manubag sa kontrobersyal sab nga “Telepono sa Barangay” niadtong tuig 2000.

Ang city hall niadtong tungora nagkontrata sa Supplier-Contractor Networking Telecommunications (Scantel) sa pag-implementar og telephone project sa mga rural barangays sa dakbayan nga sa uwahi adunay teknikal nga problema sa pagpatuman.

Gipasabot ni Dongkoy nga natubag na ang pork barrel scam ngadto sa Commission on Audit ug giklarong walay anomalaya sa telephone project.

Kumpiyansa usab siyang tubagon ang kaso sa buhatan sa Ombudsman.

Bisan ang anak niining si Cagayan de Oro City Councilor Nadya Emano Elipe niingon nga sa kadugayon sa hitabo gitunong pa sa padangaton nga eleksyon.

Samtang namahayag sab si Mayor Oscar Moreno nga dili na bag-o alang kaniya nga siya dayon ang pasanginlan ug okay lang dayon sa iyang kaatbang kung siya ang kasohan.


VIEW COMMENTS