NAKALINGKAWAS sa kasong pagpatay kang PO3 Eugene Calumba si Tejero Barangay Councilor Jessielou Cadungog, apan ang iyang drayber nga si William Macaslang pasakaan og kasong homicide.
Ang piskaliya nirekomendar sa pagpasaka sa mga kasong homicide ug attempted homicide batok kang Macaslang nunot sa kamatayon ni PO3 Calumba ug sa giingong suway nga pagpatay sa police asset nga si Michael Banua niadtong Hulyo 30.
Ang panel of prosecutors nga niresulbar sa mga reklamong gisang-at sa National Bureau of Investigation ug sa kapulisan gilangkuban nilang Fiscal Rose Marie Pabatao, nga labaw sa panel, ug sa mga sakop nga silang Fiscal Carmel Rivas ug Fiscal Ethel Miel.
Kahinumduman nga ang National Bureau of Investigation (NBI) 7 maoy niduso sa kasong homicide batok ni Macaslang ug ang CIDG7 nisang-at sa mga reklamong murder ug attempted murder batok ni Macaslang ug Cadungog.
Apan ang piskaliya wala makakita og basehanan pagpasaka og kaso ni Cadungog human giangkon sa drayber ang salaud. AZLG