NAUGDAW ang duha ka mga puloy-anan human gilamoy sa kalayo niadtong Huwebes mga alas 6:20 sa gabii sa Gumamela St., Carmen ning siyudad sa Cagayan de Oro.

Ang puloy-anan gipanag-iyahan nila ni Leon Weba ug Angeles Bongga.

Si SFO3 Rosalito Caratao sa Bureau of Fire Protection (BFP) nibutyag sa Sun.Star Superbalita nga kalit kaayo ang pag-ulbo sa kalayo niadtong gabhiona human wala kini nabantayan sa mga nagpuyo.

Daghan ang niingon ug nadungog atol sa sunog nga posibleng gituyo ang maong sunog tungod sa giingong panagbangi sa yuta nga gitukoran sa maong panimalay.

Aduna usab niingon nga faulty electrical wirings ang hinungdan tungod sa kalit nga pagbuto sulod sa panimalay.

Apan ang tanan niini padayon pang gihimoan ug masusing imbestigasyon sa BFP.

Matud ni Caratao nga walay nahibilin sa panimalay ug maayong pagkaugdaw gawas sa pipila lamang ka mga butang nga nasalbar.

Gibana-banang mokabat ngadto sa P200 mil ang danyos sa sunog apan wala pay labot niini ang danyos sa mga personal nga gamit sa mga tag-iya.

Tungod sa gihimong pagkooperar sa mga fireman uban sa mga friendly volunteer sama sa graphics, chinese volunteer ug uban pa wala na mikaylap ang kalayo sa mga kasikbit nga balay.

Sa pagsulat ning balita giatiman na sa mga opisyal sa Brgy sa Carmen ang inisyal nga tabang ug pagpahaluna sa biktima samtang ang BFP padayon pa sa paghimo og dugang imbestigasyon kalabot sa hitabo ug pagsuta sa tinuod nga hinungdan sa pag-ulbo sa sunog. (Stephanie V. Berganio)