USA ka pamilyahan ang giharos og dakop sa kapulisan sa Police Station 2 kagahapon sayo sa buntag sa dihang gipasanginlang nagpadagan og negosyo sa illegal nga drugas sa Soong 1, Barangay Mactan, dakbayan sa Lapu-Lapu.
Lakip sa nadakpan mao ang 54 anyos nga biyudang si Lydia Pinote-Aying; Fernando Pinote-Aying, 40; Vicente Pinote-Aying, 22; Michelle Tampus-Aying, 30; Marianito Gonzaga-Intong, 45, pulos nagpuyo sa Aying Compound sa Sityo Soong 1, Barangay Mactan.
Samtang si Dave Melicor, 21, taga-Sityo Buyong, Barangay Maribago gilakip sa pagsikop sa dihang naatlan nga misuyop diha sa maong area.
Ang mga dinakpan pulos mga newly identified nga nalambigit sa illegal drugs sanglit wa kini malakip sa drugas watchlist sa kapulisan.
Ang Police Station 2 Drug Enforcement Unit nga gipangulohan ni PCI. Wayne Magbanua nihimo og buy-bust operation sa Aying compound inabagan sa taga Philippine Drug Enforcement Agency (PDEA) 7, kagahapon sa kadlawon.
Sa dihang poseur-buyer nipalit og droga diin nipositibo ang transaksiyon dali nga mihimo og pagsiksik sa area ang mga operatiba.
Ubang mga dinakpan gisikop kay nakuhaan og droga gikan sa ilang posisyon nga gibana-bana nga mokantidad ang tanan dul-an sa P65,000.
Ang mga nahisgutang dinakpan gilumpong og pusas ug gidala sa Regional Crime Laboratory office alang sa ultra-violet (fluorescence powder) test ug drug test sa wa pa ibalhug sa Lapu-Lapu City holding cell samtang giandam ang tukmang kaso batok kanila.