PATAY ang 4 anyos nga bata human naatrasan sa sakyanan niadtong Huwebes mga alas 6:20 sa hapon sa Zone-8, Cugman ning siyudad sa Cagayan de Oro.

Giila ang biktima nga mao si Britney Jane Taganahan.

Sa gihimong pakighinabi sa Sun.Star Superbalita ngadto kang SPO1 Antonio Sambaan, traffic investigator sa Police Station 10 (PS10) sa Cugman nibutyag nga aksidente lamang ang nahitabo dihang paingon na nga mogarahe ang driver sa van nga mao si Jessie Gungob.

Si Taganahan niadtong tungora nagdula kauban ang mga higala ug wala namatikdan ang sakyanan.

Apan aksidenteng natapilok ang 4 anyos gumikan sa pagdula niini hinungdan sa pagkaligid ug nasapon sa ligid sa van. Naigo ang dughan sa biktima ug uwahi na dihang nabantayan ni Gungob nga nabangil kini sa ligid.

Dili makatuo ang suspetsado sa nakitang biktima nga nabangil ilawom sa sakyanan hinungdan kini mismo ang daling midala sa biktima sa Northern Mindanao Medical Center (NMMC).

Apan pipila ka minuto ang nilabayng sulod sa emergency room gideklarar sa doktor si Taganahan nga patay na.

Matud ni Sambaan nga uwahi na dihang ilang narespondehan ang hitabo ug sa balay tambalanan na nila nakuha ang suspetsado kinsa maoy mismong nitawag kanila.

Kasamtangan nga gikustodya sa PS10 si Gungob kinsa gikatahong dili pasakaan og kaso sa mga hingtungdan labina nga silingan lamang ingon man aksidente ug andam kini sa pag-abaga sa mga galastuhon.