“Kung klaro nga sipyat nato, mas nindot seguro nga angkunon dala pagpahiubos aron kita pasayluon bisan sakit ang konsekwensya, igsuon.”
HELLO!!!
Ang bidyu sa aroganteng babayeng fiscal nga adunay traffic violations ug ang binastos nga pakigtigi sa iyang bana ngadto sa mga nagpatuman sa balaod sa trapiko ningkabat na og 14 million views here and abroad, migo.
Sikat!!! Dili na nako dugangan og deskripsyon kay nasayud ako nga nabalitaan na pod ninyo kini, di ba, pre?
Siyempre, makasurok gayud og dugo ang maong panghitabo kay kung kinsa pa kadtong nakaeskuwela og tarong, ug adunay lalum nga kasayuran sa balaod; sila pa ang nagpabadlong! Mao kini ang ginaingon sa mga katiguwangan nga walay bili ang salapi ug taas nga edukasyon kung ngil-ad og batasan ang tawo, igsuon. Attitude matters gayud!
Daghan na kaayo ang nagsulti'g dili maayo kay 5 minute girl ug sa iyang bana mao dili na nato dugangan pa. Ang balaod ug mga ahensiya nga nagpatuman niini ang bahala. In fairness, nangayo na'g pasaylo ang mag-asawa - hinaut makatuon ta nila apan si Asec. Mocha Uson - wa pa lagi??? Nangampanya siya sa pederalismo sa law-ay nga pamaagi, migo, unya mag-senador sa nasud nato?- YUCKS!!!
Sa pagkatinuod, duna pod kitay mga “hilas” sa kalawasan nga usahay mangalisbo hinungdan sa pagpanagbangi, migo. Kung klaro nga sipyat nato, mas nindot seguro nga angkunon dala pagpahiubos aron kita pasayluon bisan sakit ang konsekwensya, igsuon.
Mogawas gayud ang atong mga kaisog (apil ang baho sa kalawasan) usahay nga dili dayon nato mabantayan. Grasya ra gayud sa Kahitas-an nga wala kita nabutang sa sitwasiyon nga atong nabalitaan. Magpasalamat kita sa Ginoo dala ampo nga dili mahimong garbuso aron mahimong malinawon ang atong pagpamuyo. Matud sa Bibliya, “pride comes before destruction.”