SULTAN Mastura, Maguindanao Province -- Nagka-engkuwentro ang duha ka mga armadong pamilya sa duha ka kumander sa Moro Islamic Liberation Front (MILF) alas 6:15 sa gabii niadtong Huwebes.
Matud ni Maguindanao Police Provincial Office director, Senior Superintendent Edwin Wagan nga nagkapinusilay ang kabanay nila Kumander June Barang ug Kumander Munting nga pulos mga miyembro sa MILF sa utlanan sa Sultan Kudarat ug Sultan Mastura sa nahisgutang probinsiya.
Ang pagsinukliay og mga bala sa duruha ka banay sa kumander milungtad og 45 minutos.
Tungod niini, mga molupyo sa dapit nakugang pag-ayo ug daling nanghikling paingon sa mga luwas nga lugar.
Nahunong lamang ang pinusilay sa dihang nagpatunga ang mga lokal opisyal, Muslim elders ug mga opisyal sa MILF.
Usa ang giingong napatay sa grupo ni Barang samtang duha ang naangol sa pundok ni Munting.
Nasayran nga dugay na nga dunay dumot sa ilang matag pamilya ang duha ka lider sa MILF gumikan sa panag-ilog sa yuta nga ilang giugmad.
Hinuon, hinay-hinay nang nanguli sa ilang panimalay ang mga namakwit nga mga molupyo gumikan sa maong panag-engkuwentro. (Edgar E. Fuerzas)