Kapulisan nagkatag sa Indak-Indak

MAS gipahugtan pa ang seguridad sa Davao City labi na nga matigayon karong adlawa ang Indak-Indak sa Kadayawan ug ang mahitabong Floral Float parade ugma’ng adlawa.

Sumala sa Davao City Police Office (DCPO), dunay daghang ihap sa kapulisan sa dakbayan ang naka-deploy karong adlawa uban sa mga force multipliers ug sa Task Force Davao.

“Nakahan-ay na atong security plan, even prior the opening, hitsas na ug panegurohon nato nga luwas gayod atong katawhan diri sa Davao City,” ingon ni DCPO Spokesperson Senior Inspector Ma. Theresita Plaza-Gaspan.

Gawas sa mokabat 3,000 ka mga pulis, gipuwersa sab ang dul-an 1,000 ka mga auxiliary police gikan sa dose ka mga istasyon sa kapulisan sa DCPO.

Hugot sab ang inspeksyon sa tulo ka mga checkpoint sa TF-Davao sa Brgy. Sirawan, Toril Davao City, Brgy. Lacson, Calinan District ug sa Brgy. Licanan sa Bunawan District.

Usa-usang gipang-utingkay ang sud sa mga bag sa mga pasahero una sila hingpit nga makasulod sa Davao City.

Nagsubay sab sa kadagatan ang Regional Maritime Office sa Police Regional Office 11 uban sa Philippine Coast Guard ug sa Naval Forces sa Eastern Mindanao Command aron mabantayan ang kadagatan sa mga tawo nga dunay dautang tinguha.

Mipahigayon sab og aerial surveillance ang Task Force Haribon sa Eastmincom aron maseguro nga walay mga dautang tawo sa palibot samtang nagpadayon ang mga aktibidad.

Nakatutok sab ang atensyon sa Special Weapons and Tactics sa PRO-Davao Region sa sentrong bahin sa Dakbayan kun asa matigayon ang sentro sa kaugdahan sa ika-33rd Kadayawan sa Dabaw.

Naghangyo ang otoridad nga mosunod sa mga regulasyon nga gipatuman aron di unya malangan sa paghiling diha sa pagsulod sa mga lugar asa gipahigayon ang programa. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph