DILI na gayod mapugngan ang paspas nga pagtaas sa ihap sa mga politiko nga nagpa-miyembro sa Hugpong Ng Pagbabago (HNP).
“Na-overwhelm ko kay we only expected 3,300 na mo-attend but it doubled,” tipik sa giingon ni HNP chairperson Davao City Mayor Sara Duterte-Carpio sa iyang pamulong kinsa miatubang sa dul-an syete mil ka mga politiko nga nagpailawom sa HNP atol sa mass oathtaking, sa SMX Convention Center, SM Lanang Premiere, Davao City, Biyernes, Agosto 17.
Mismong si Pangulong Rodrigo Duterte ang midayeg kang Mayor Sara gumikan sa paspas nga pagtaas sa ihap sa mga nagpa-miyembro.
“I appreciate what Inday is doing,” ingon ni Pangulong Duterte sa iyang pagpamulong.
Gidasig sab ni Pangulong Duterte ang mga miyembro sa HNP nga iyaha kining i-kampanya.
“If you want me to campaign for you, I will,” sumala sa Pangulo ngadto sa mga miyembro nga nag-oath, kagahapon.
Ang HNP giorganisa ni Mayor Sara diin nagtumong nga mahugpong ug malig-on ang alyansa sa mga politiko sa Davao Region.
Bulan sa Hunyo ning tuig, ang Commission on Elections mitugot sa HNP nga mahimong usa ka “regional party” sa status niini.
Sa oathtaking Biyernes, naa si kanhi Davao City Vice Mayor Paolo Duterte ug ang asawa niini nga si January Duterte ug ang batan-ong Duterte nga si Sebastian.
Sumala ni Baste ug ni Pulong nga anaa ang ilang kinasingkasing nga pagsuporta sa ilang amahan ug kang Mayor Sara ingon ug alang sa kaayohan sa tanang mga Pilipino.
“As I join HNP today, I also commit to its advocacies and determined resolve to support President Rody and push for the fulfillment of the Duterte administration’s plans and programs for the country and the Filipino people,” sulti sa kanhi bise mayor sa Dakbayan.
Naa sab sa oathtaking isip mga giimbita nga mga bisita ang pito ka posibleng senatorial candidates sa administrasyon sa midterm elections sunod tuig.
Ang mga nahisgutan mao sila Special Assistant to the President Christopher “Bong” Go, presidential spokesman Harry Roque, Senators Cynthia Villar ug Joseph Victor Ejercito, Ilocos Norte Gov. Imee Marcos, former Philippine National Police chief Ronald ‘Bato’ dela Rosa ug si Maguindanao 2nd district Rep. Zajid Mangudadatu.
Sukad sa pagsuwat ning balita alas 7 sa gabii, kagahapon padayon pang namulong ang Pangulo ug nakatakda suma pa kining mo-oath sab aron mopa-miyembro sa HNP.