MIDANGAT lang og lima ka oras gikan sa iyang paghiabot sa Jakarta, Indonesia niadtong Huwebes, wa dayon maglangan og panahon ang Fil-Am nga si Jordan Clarkson ug miapil gilayon kini sa ensayo sa Philippine Team sa Gelora Bung Karno’s basketball arena sa Jakarta, Indonesia.
Lapoy ug mahulagway nga kulang pa man tuod sa pahuway tungod sa hataas nga biyahe gikan sa Los Angeles, USA, apan gihangop ug daw sa dali ra nga nakasabot sa sistema ni coach Yeng Guiao ang guard sa Cleveland Cavaliers.
Ang Philippine team gikatakdang makigsangka sa China karong Martes alang sa ilang ikaduhang misyon sa 2018 Asian Games men’s basketball sa Group D.
Hinuon nakasiguro na og luna ang mga Pinoy alang sa sunod round human nila gilubong niadtong Huwebes ang Kazakhstan, 96-59, sa usa ka lopsided nga kadaugan bisan og wala makaduwa si Clarkson niadtong higayona.
Si coach Yeng Guiao mihulagway ni Clarkson nga taas og IQ sa basketball nga dali ra kaayong nakakuha sa iyang sistema.
“Excited din akong makita ito eh,” matod ni Guiao nga nakutloan sa ABS-CBN News. “Kung anong shape niya, kung kaya niyang i-absorb ‘yung plays, kung ano ugali niya.”
Si Clarkson dili magpanagana og pangutana sa mga plays ni Guiao ug sa assistant coach niini nga si Caloy Garcia.
“He is already very fluid with the patterns. That’s an indication of high intelligence and high IQ,” dugang ni Guiao.
Giganahan usab og maayo si Clarkson sa ilang praktis.
“It was a lot of dribble-drive, a lot of ball movement, ball screens, so I fit right into it. It was easy to pick up for me,” matod ni Clarkson. JBM