GIPABUHAGAY ni Senator Miguel Zubiri nga moretiro siya isip presidente sa bag-ong naporma nga Philippine Eskrima Kali Arnis Federation (Pekaf) kon dili maangkon sa Pilipinas ang overall tally sa arnis event sa Southeast Asian Games sa sunod tuig.
Hinuon giklaro ni Zubiri nga dili angayang molugak bisan gamay ang RP arnis national team gumikan kay nasayod siyang grabe ang pagpangandam sa ubang mga nasod alang sa 30th edition sa kompetisyon nga i-host sa Pilipinas karong Nobiyembre 30 hangtod Disyembre 10 sa sunod tuig.
“We can’t be complacent because other countries will be preparing as early as next month,” matod ni Zubiri sa press conference sa miaging gabii sa Waterfront Hotel sa Lahug, Cebu City.
Nagkanayon si Zubiri nga iya mismong ipahibalo sa Philippine Olympic Committee (POC) nga mokanaog siya sa iyang posisyon sa PEKAF kon mapakayas ang nasod paglanglat sa overall arnis title sa matag duha ka mga tuig nga kompetisyon.
“I’m not an all talk, I walk the talk. If I can’t deliver, then I will resign,” dugang ni Zubiri, kinsa maoy naghiusa sa mga grupo sa arnis. ESL