Cebuana skateboarder masaligong maka-gold

SUGBOANONG skateboarder nga si Margielyn Didal masaligon sa iyang kampanya nga maka-gold medal sa 2018 Asian Games.

Ang lumad nga taga Lahug, dakbayan sa Sugbo, pinaagi sa online interview sa ABS-CBN. mipadayag nga kaya niyang patigbabawan ang iyang mga kaatbang ning matag upat ka tuig nga kompetisyon.

Ang pasalig sa 19-anyos kinsa ikaupat sa lima ka mga anak sa usa ka panday kansang asawa usa lang usab ka yanong mamaligyaan og pagkaon sa ilang barangay, nagagumikan sa iyang grabing ensayo didto sa Los Angeles, Minneapolis ug Hong Kong.

Sama kaniya, mga kanhi roller skaters usab ang iyang mga ginikanan nga mao usay nakapaagni kaniya sa nagpangidaron pa siya og 12 anyos.

Tungod sa iyang talagsaong talento, nakadawat siya og mga tanyag nga mao karon ang nagsuporta sa iyang pamilya.

Sa bulan sa Mayo ning tuiga, iyang nahatagan og igong dungog ang Pilipinas human kini nasulod sa final round sa Street League Skateboarding (SLS) Pro Open London Women’s Qualifier sa London.

Nalupig man tuod siya ni Jenn Sot sa US apan sa wala damha mitapos siya sa maong kompetisyon nga ikawalo sa overall standing.

Kini maoy naghatag kaniya og positibong panglantaw sa Asian Games nga pormal nga ablihan karong adlawa didto sa Jakarta, Indonesia.

Alang kaniya nga ang Asian Games anaa lang sa ikatulong level sa skate event bisan tuod og iyang giangkon nga ang Japan maoy usa sa pinakalig-on niyang kaatbang.

Wa itago ni Didal ang kamingaw sa iyang pamilya atol sa hataas niyang training gawas sa nasod, apan kini iyang gihimo ug gisakripisyohan dili lang tungod sa iyang pamilya kon dili alang usab kini sa tibuok nasod. JBM