World dancesport sa Cebu sa Sept. 8

MANULONG ang dekalidad nga mga manayaway sa kalibutan lakip na ang world no.2 nga panagpares nila ni Timur Imametdinov ug Nina Bezzubova sa Germany sa labing dakong dancesport competition sa Pilipinas nga giulohan og World Dancesport Federation Cebu Open and 10th Dancesport sa Sugbo karong Septiyembre 8 sa Waterfront Hotel Grand Ballroom sa Lahug, ning dakbayan.

Ang dancesport patron sa Sugbo nga si Edward Hayco mihulagway sa panagpares nila ni Imametdinov ug Bezzubova nga sama og kalibre sa superstars Maria Sharapova ug sa magsuong sila si Venus ug Serena Williams sa tennis.

“It’s like bringing Sharapova and the Williams sisters play in Cebu,” matod ni Hayco sa press conference kagahapon sa dancesport studio sa Cebu City Sports Center.

“This competition is a world class competition but there are many reasons why we brought up this competition, it’s for the kids of our grassroots program.”

Gipasabot ni Hayco, kinsa mao sab ang tsirman sa Cebu City Sports Commission (CCSC) nga ilang tinguha nga sa linghod pa nga pangidaron, personal nang makasaksi ang mga sakop sa ilang grassroots program sa abilidad sa nanag-unang dancesport artists sa kalibutan.

Anaa usab ang panagpares nila ni world no.9 Hidaeki Kishi ug Yoshimura Haruka sa Japan.

Sa kinatibuk-an, 17 ka mga parisan lakip na ang bugtong representante sa Pilipinas nga sila si Angelo Marquez ug Stephanie Sabalo ang mokiaykiay sa Cebu Open. Aduna sa’y mga partisipante gikan sa Australia, Mongolia, Korea, Russia ug Vietnam.

Usa ra man tuod ang representante sa Pilipinas apan dako ang poruhan nga makalabni lang gihapon og medalya ang nasod.

Nagkanayon si Team Cebu City dancesport coach Crisaldo Rendon nga makatabang og dako sa kampanya nila ni Marquez ug Sabalo nga ania sa Pilipinas ang kompetisyon.

“Dako ta’g chance kay kon atong turf, lahi ra man gyud ang performance.” pasabot ni Rendon.

Subay niining maong kalihukan, adunay ipahigayon nga Dancesport sa Sugbu video documentary competition.

Alang sa mga interesado, mahimong motawag ni Ron Heri Tan sa 0905-5608878 o 0943-5422898 hasta kang jenette Flores sa 0932-2601850 o 0956-7220010.

Sa laing bahin, ipahigayon karong adlawa ang culminating event sa grassroots program sa CCSC sa Cebu City Sports Institute sa brgy. Sawang Calero ning dakbayan. ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph