GIKLARO sa Provincial Population Office (Popcom) nga dili “anti-life” ang Reproductive Health Bill nga gihingusgang mapatuman karon sa administrasyon ni Presidente Rodrigo Duterte.
Nasayran nga positibo ang pagdawat sa mga lungsod sa implementasyon sa bag-ong balaod nga Reproductive Health Law.
Matud ni Provincial Population Officer Andrew Gapuz nga mando ni Duterte nga unta maimplementar kini aron ang katawhan maedukar ug makasabot niini nga balaod nga mogarantiya sa kinatibuk-an nga paagi sama sa contraception, fertility control, sexual education, ug maternal care.
Dugang pagpasabot niini nga dili dautan ang maong balaodnon human giisyu nga dunay aborsyon ug giingong anti-life.
Gipasabot ni Gapuz nga ang balaodnon dako kaayo og kaayohan sa katawhan tungod kay mahimong responsable ang nga mga ginikanan, anak ug isip usa ka membro sa komunidad.
Sa pagpatuman niini, klaro kaayo nga ang mga pasilidad niini pulos “pro-life,” matud pa niya.
Ang mga lungsod nakamugna na og mga reproductive health officers niadtong bulan sa Mayo diin sila maoy gitahasan nga mopasabot sa katawhan kalabot niini nga balaod.